يوم الأربعاء

كان يوم الأربعاء يوم إرشادي لنا المستجدات في قاعة المؤتمرات كان وقته في المسج اللي وصلي واللي اعلنو عنه من 9 لحد 1 الظهر وفعليا كانت من 10 ونص تقريبا لحد 12 o_O
كانت كله كلمة المسؤولين في الجامعة
د. أسامة طيب مدير جامعة الملك عبدالعزيز
د. عبدالفتاح سليمان مشاط عميد القبول والتسجيل
عميدة شطر الطالبات د.نجاح بنت يوسف عشري
وكيلة شطر الطالبات د.خديجة بنت عمر بادحدح

وكم كلمة من كذا وحدة مو متذكرتهم
سجلت كلمة دكتورة ما أعرف مين تكلمت عن السلوك والأخلاق وفضل العلم وكان كلامها حلو ولما اسمعه اتشجع للأفضل 🙂
كان كلة تمام … المكان زحمة وضحو لنا عن السنة التحضيرية أكثر وكل شئ يخص الجامعة والدراسة وكيفية المشاركة في الأنشطة. اللي تقدموا للتسجيل للجامعة 100 ألف طالبة انقبلو 20 ألف

الأجمل أنه البنت اللي جلست جنبي تشبهلي كثير وتبغى تدخل إعلام انبسطت كثيييييير وأخيرا لقيت وحدة نفس الرغبة يسعد قلبها ربي .. إن شاء الله بحكيلكم عنها لأنها إنسانة طموحة ورائعة بكل معنى الكلمة
اول ما دخلنا واحنا جايين من الجامعة لقاعة المؤتمرات اخذو اسماءنا ونهاية اللقاء بدأو يسحبو على جوائز مرة رائعة دورات حاسب و انجليزي وطابعات hp و جوالات ووو ايش كماان بس هذا اللي اتذكره
بعدينا طلعنا وعاملين أركان لكل كلية طبعا رحت للآداب عشان اشوف عن الإعلام 😛 أخذت خطة الدراسة في القسم وكذا قسم ثاني و كوب مكتوب عليه كلية الآداب وقلت لها ابغى مكتوب عليه إعلام قالت مافي واعطتني تاريخ :\ المهم طلعنا بعدها للجامعة ورحنا للبيت
الكلمة اللي سجلتها نفسي اسمعكم اياها بس ما أقدر لأنو ما استأذنت إني أسجل هذا أولا وكمان اللي تكلمت ما تعرف فبلاشي 🙂
لحد الآن السيدة العجوز حنونة بصرامة وحابتها الله يديم المحبة ويبعد غضبها عني

تصبحون على محبة وعلم ونوم العوافي يا أنا وأنتم  🙂

Advertisements

8 تعليقات to “يوم الأربعاء”

  1. هذيان Says:

    يووه حتى عندنا كان الأربعا اليوم الإرشادي :\
    رحنا أنا وصديقتي نستهبل نقولهم احنا مستجدات دخلونا
    قالوا برا بس نعرفكم انتو عجز الجامعة : P

    الله يوفقكم 🙂

  2. afnan Says:

    تمنياتي لك بالتوفيق 🙂

  3. max13 Says:

    اتمنىلك النجاح والتوفيق

  4. { فـوآح‘ } Says:

    مبروك القامعة يا ستي ..
    //
    أحنا يوم الأربعاء كان عندنا درس مهارات وجلسة ومحاضرتين << بس !
    //
    الله يوفقكم ,, ويجعل عاقبك حميدة 🙂

  5. Rose Says:

    اهلين هذيان
    لووول
    والله البنات احسهم حركات مدرسة
    لما يقولو لقب وحدة من الدكتورات يكون لقبها عجيب تسمعي الضحك
    احس مالهم داعي مررة :\
    منورة يا سكرة
    🙂

    ـــــــ

    أفنان و ماكس
    ولكم كل ما تتمنون
    🙂
    منورين

    ـــــــ

    فوآحُ
    الله يبارك فيك
    حركات بالتوفيق إن شاء الله 😀
    منور
    🙂

  6. الإعصار الأحمر Says:

    بالتوفيق 🙂

    والله نحن لا يوم ارشادي ولا شيء
    من تاني يوم في الجامعة بدأت المحاضرات لين اليوم 😦

    طبعاً نحن علمي 😀

  7. Rose Says:

    اهلين الإعصار
    اظن حتى العلمي عندنا ما بدأ كل الاسبوع الاول كان تعريف عن المنهج بس
    🙂
    موفق يارب

  8. سنة أولى جامعة « Flowers Revelation Says:

    […] بعدها كتبت (يوم الأربعاء) […]

التعليقات مغلقة.


%d مدونون معجبون بهذه: