ذكريات الدراسة

رجعته أخيرا 😛

عدنا للواجبات
واجب مررتوا عليا أبلة مضيعة عن ذكريات الدراسة انتو ليش تحبون تقلبون المواجع امزح لا مواجع ولا بطيخ احلى ايام كانت المدرسة اصلا مافي غيرها ما دخلت الجامعة عشان اقول الجامعة احلى

عزيزتي الطالبة ابدأي الإجابة على الأسئلة مستعينة بالله و تذكري قول المصطفى “من غشنا فليس منا” وتأكدي من كتابة اسمك وجميع بياناتك صحيحة قبل البدأ في الإجابة وفقكِ الله

1- أفضل مرحلة تعليمية درستها ؟

كلها حلوات وكويسات ولازم فيها تنغيص ونكد و فلة و ضحك الإبتدائي كنت الرائدة دائما D كانوا البنات يسمعون كلامي ودايم العريفة على الصف كح كح كانوا كثير صحباتي الفصل كله في وحدة الله يذكرها بالخير جات مدرستنا وكنت ثالث ابتدائي بس والله يا كانت تكذب كذب تحب تسوي نفسها الافضل وداااااايم تكذب علينا الين سادس ابتدائي و في المتوسط تركتها D و أولى متوسط كنت لوحدي كانت اسوأ سنة في حياتي كنت كسلاااانة واغيب كثير وفي نص السنة طلعت نتايج الترم الاول وما جبت ممتاز لما شفت الشهادة بكيت < رهيييييب السمايل كنت بالقوة جيد جيدا دقة واصير جيدالوضع في المتوسط اختلف عليا كثير من كل شئ المعاملة مع الابلات المناهج خصوصا الرياضيات حقدت عليها حقد ومازال مستمر بس خف عن زمان … في ثاني متوسط كنت مرة شاطرة وثالث نزل مستوايا بس بدأت نفسيتي تستقر الين طلعت الثانوي .. اولى كانت غبية وثاني كنت كسلااانة ثالث حلوة يعني بعد هذا كله ثالث ثانوي طلعت احلى سنة عشان كبرت

2- أسوأ مرحلة تعليمية مرت عليك ؟

تمت الإجابة عليه مسبقا أو انظر للصفحة اربع طعش وخشبة

3- أفضل المدرسين اللي مروا عليك ؟

في ابلة كانت تدرسني في تحفظ القرآن دخلته فترة الابتدائي ابلة نجاة مرة كنت احبها ومرة طيووووبة و رائعة بعدين معد صارت تجي وانا بطلت من التحفيظ في المدرسة مممممم ابلة ابتسام في المتوسط كانت تدرسنا الرياضيات مرة رائعة… و كمان ابلة نهلة في اولى ثانوي درستنا عربي كانت تاخذنا اوقات 6 حصص في اليوم ما نطفش منها .. ابلة نورة في ثالث ثانوي برضوا عربي تعلمت منها كثير ممممم بس البقية الله يستر علينا وعليهم

4- أحب المواد اللي درستها ؟

البلاغة والنقد و الأدب في ثالث ثانوي كانت مرة حلوة.. التربية الفنية في الابتدائي كان فلة مع ابلة ميساء كنت انبسط لما كانت تصحح لي الرسمة وتكتب الرسامة الصغيرة اوووه محد قدي ذاك الوقت والله حماااس

5- أكره المواد اللي مرت عليك ؟

المكتبة والجغرافيا يالطييييييف اكرههااا صراحة المكتبة من المدرسة كانت مدري كيف ما تشرح تقرا الكلام وتجلس مدري ليش مخلينها تدرس ما تصلح لو بس تكون امينة للمكتبة افضل من انها تدرس وكمان درستنا ثالث ثانوي بس الان اتوقع مع المنهج صار افضل من المنهج اللي درستة وثالث صار تطبيق للبحث حيكون افضل للطالبات وأفود )

6- آخر شهادة علمية حصلت عليها , وتخصصك ؟

ثانوية عامة أدبي قولوا عقبال الدكتوراه )

7- أطرف موقف مر عليك في دراستك ؟

اتذكر كنت في الابتدائي وقتها ابويا قالي احفظي آخر آيتين في سورة البقرة وكنت مبسووطة حافظتها وكان يومتها الاذاعة على فصلنا ودايم انا اقرأ القرآن طلعت وانا ثقة ما شلت معايا مصحف وقال اني بقرأ غيب اللي حافظته مع الربكة نسيت كل الاية وصارت ابلة التدبير تذكرني احس وجهي صار ستة في سبعه من الاحراج وبطلت اعمل فهلوة واطلع من غير مصحف

على طاري ابلة التدبير بقولكم موقف ثاني في خامس ابتدائي كانت الفسحة بعد الحصة الثالثة دق الجرس وطلعوا البنات للفسحة وانا مدري ليش جلست كنت اكتب شئ يمكن مو عارفة جات الوكيلة ونزلتني المهم رحت واتذكرت انو الرابعة علينا تدبير منزلي وطبعا لازم مريلة الطبخ واختكم في الله نسيتها وابلة التدبير قليلة ادب ومرة عصبية وكنت اكره يصير موقف بيني وبينها ما احب وقاحتها المهم قلت للبنات بسوي نفسي تعبانة وطلعوني الادراة < خطط المهم حاولت قد ما اقدر اطلع شكلي بائس وطلعوا معايا بنتين للادارة ويقولون يا ابلة روز تعبانة تقول المديرة اشبها قلت لها ما فطرت < باللهي كان تقول الوكيلة انا نزلتك للفسحة كيف ما فطرتي انا لما قالت كذا فكرت اسوي اغمي عليا بس الحمدلله جات سليمة وقلت نسيت المصروف يا ابلة في البيت قاموا دخلوني الادراة وجلست وجابولي فطور < فطرت مرتين بعد ما دق جرس الرابعة وخلصت طبعا التدبيرحصتين نزلت في الخامسة ومانتبهت لي قلت احسن ومشيت اليوم بسلام بعدها ما حسيت اني سويت شئ غلط يعني المفروض اني كذبت ومدري ايش بس اسلوب ابلة التدبير غبي والا ايش يخلينا نفكر نكذب :/

8- أصعب موقف مر عليك في دراستك ؟

ساعة على هذا السؤال ماني متذكرة موقف معين ممممممم ذكروني يا هوه P مو عارفة مافبالي موقف مرة صعب ايييوا في اولى ثانوي فرقونا انا وصاحبتي هي في فصل وانا فصل و حتى الفسحة مو مع بعض وكانت ازمة اوقات بس اقابلها في الصرفة واحنا خارجين اسلم عليها ونطلع مرة كانوا يجهزون لحفل مدري ايش وكان حصص فاضية اطلع عندها او هيه تجي ومرة نزلت عندي ووقفنا عند الفصل ونتكلم وقتها انا كنت قاصة شعري وحركات وكانت تكلمني عنه مدري ايش تقول على القصة من هنا طويل اكثر وماسكة شعري قامت جات ابلة الفني وقالت لها فصلك هنا قالت لا كان تقولها هيا اطلعي فوق وانا دخلت الفصل شوية لما انشغلت رجعت انا طلعت لصاحبتي وكلمتها ونزلت وانا نازلة كانت صاحبتي تطالع لي وانتبهت لنا ابلة الفني مرة ثانية قامت ودتنا الادارة وتقول للمديرة كانت تتدلع بشعرها وقلة ادب وقلبت الموضوع على اننا بنات مدري ايش استغفرالله بس انا عصبت وصرت اطالع لها من فوق لتحت واقول لا وهي تتكلم وانا اقول لا والمديرة عرفت انها تكذب لانو سوت مع البنات مشاكل كثيرة ودايم تكذب وتتبلى عليهم والمديرة مشت الموضوع لكن صارت تتنبه لنا اكثر عبالها انوو ممكن يكون صح كلام الابلة الله يكافيها يا دعيت عليها من قلب غابت كم اسبوع صار لها حادث والسنة اللي بعدها طوال السنة تغيب وتعبانة احس تستاهل عشان التفكير الاعوج تسيبو بس D

اوه احس كلامي كثير حشيت من قلبي :/ بس جاوبت بأمانة يا ابلة مو ما بمرر على أحد اللي حاب يحله يحله )
موفقين في اختباراتكم يارب )

سبحانك اللهم وبحمدك أشهد أن لا إله إلا أنت أستغفرك وأتوب إليك

Advertisements

8 تعليقات to “ذكريات الدراسة”

  1. Gdedouy Says:

    عقبال الشهادة الجامعية
    وبعدها الماجستير
    وبعدها الكتوراة

  2. ريــم Says:

    ههههه الله يسعدك يا روز عقبال ما تحلين واجبات الجامعة (:

  3. ريــم Says:

    روز وحشتيني ):

  4. Rose Says:

    Gdedouy
    آمين يارب
    شكرا لك 🙂

    ــــــــــ

    أهلين ريمو
    آميييين يااااااااارب
    وانتي اكثررررر
    انتي مسوية ثقل بعد ما خلصتي الجامعة 😛
    🙂
    منورة ياحلوة

  5. mbet0hm Says:

    ههههههههههههه
    اجل ماتفطرتي لووووووووووووووووووول

    حلك ممتع

    وتستاهلين 10 من 10

    وشاطرة صرتي تحلين الواجبات

    برافوووووووووووووا

  6. nightingale Says:

    هههههههههه
    أعجبتني ردودك وخاصة المواقف المحرجة ,
    كانت في قمة الفكاهة.

    أختي روز
    رائعةٌ هي مدونتك , لقد أعجبتني,
    يبدو أنني سأزورها كثيراً.
    دمتِ بخير.

  7. Rose Says:

    اهلا ابلة مضيعة
    ابغى نجمة 😛
    تسلميلي
    منورة
    🙂

    ـــــــــــ

    اهلين نايت
    دوم الضحكة 😀
    تسلم يارب
    تنورها
    🙂

  8. الأرشيف « Flowers Revelation Says:

    […] كيف كتبت كذا خصوصا اذا حسيت امي كنت ثرثارة من غير فايدة زي هنا مثلا بعد ما كتبت البوست كرهته مرة وما قرأته مرة ثانية […]

التعليقات مغلقة.


%d مدونون معجبون بهذه: