في الأحوال

مساءكم / صباحكم جنة و عبق طفولة 🙂

أمس طلعت بطاقة أحوال أخيرا :mrgreen: الحلاوة بهذه المناسبة
رحت وانا معتمدة على ابويا اعتماد كلي اللي يقولي اسويه من غير نقاش وبما اني الفتاتو الطيبتو < ما تقلد فلازم اسمع كلام ابويا 😛 المهم بلا فلسفة عالصبح …

طلعت السيارة وانا دااااخية الساعة 8 وانا نمت على صلاة الفجر واليوم اللي قبله اخويا واختي تعبوا وسخنوا و النت قطع عالفجر من باب النذالة المهدية لنا من الاتصالات انا بعدها تأزمت نفسيا 😦 نمت وصحيت في الساعتين ستين مرة :/ لما ابويا دق على باب الغرفة يلا قومي بنمشي ما قدرت اقول شئ بكيت ماحيلتي غيره تنفيس عن ما يخالج الفؤاد < وينك يا ابلة نورة :mrgreen:
طلعت السيارة وانا واصلة حدي داااايخة عالاخر والطريق كلو وانا الشمس تتعب افكر في ابويا يا كثر مشغاله تعب والله

دخلت عندهم واعطيتهم ورقة ابويا اعطاني هيه قالت ارتاحي شوية و ارتحت ساعتين ايوا نسيت الجوال يعني مافي اي وسيلة اتصال مع ابويا < من زود التركيز عالصبح اشوف ناس تدخل بعدي وتخلص وتطلع وانا مسنترة عالكرسي استنى اسمي :mrgreen: سرحت كثير المووهييييم الى الان ما وصلت للمهم الناس اللي شفتهم كذا وحدة كبيرات في السن جايين لوحدهم 😦 او مع الشغالة مرة يحزنوا احس نفسي لو اعرف اولادها او بناتها مدري ايش اسوي بس هذي أمكم بعد ما صارت في حاجتكم ما تلقاكم تلقى الغريب يهتم فيها 😦 والله بركة وجودهم بركة لكل العيلة لكن ما يحس فيها اللي من يفقدها لما طلعت السيارة قلت لابويا قالي يابنتي ياما حتشوفي الله لا يبلانا ياليت كل الناس زي ابويا والله ما عمري شفت احد بار بأمه وابوه زيه مو عشان ابويا لكن هذي الحقيقة و عشان كذا ربي مبارك له في كل خطوة يخطوها جدتي توفت ولكن مازال يبرها يسوي عمرة لها يتصدق عنها يدعيلها دايم ويذكرها بالخير الله يرحمها برحمته 😦 وياليت قومي يفقهون ؟!

الشئ الثاني سؤال بس ليش البنات لما يتصورون يحطون كيلو ميك اب

وكمان كذا وحدة وهيه داخلة سييييدة على موظفة معينة تسلم عليها وشوية يتنادى على اسمها وبعدين وهيه طالعة تقول سلمي على أمك باللهي والا سلمي على اختك ومدري اشكلو عيني عينك شغل واسطات

انا دخلت المكان الساعة 9 إلا شئ وجلست لحد 10 مو عارفة ايش اسوي استنى اسمي وحدة جنبي سنة افكر اطلبها الجوال اكلم ابويا والا لا قمت قلت لها واتصلت على ابويا
أنا : السلام عليكم ابويا انا من اول استناهم ينادون عليا
هو: طيب مو معاكي رقم
أنا: لا والله في ناس كثير جوا بعدي وطلعو ابويا مدري ايش اسوي < اول مرة احس اني بنت 5 سنوات :/ مو أول مرة يا كثر

هو: طيب تكلمي روحي قولي للموظفة.
أنا:خلاص طيب

قفلت ورحت قلت لها لو سمحتي من اول اعطيتكم الورقة قالت ايش اسمك قلت لها قالت روحي ارتاحي دقيقة وتناديني واعتذرت للتأخير معليش الزحمة ايوا ادري زحمة مو عوايلكم كلها تمشي اول بعدين رحت سنترت قدام الكاميرا وتصورت طلعت صورتي مرتبة 😛 أهم نقطة بعدين طلعت لقيت ابويا واقف في الظلة يستناني عشان عارف انو ما معايا الجوال ولما قلت نسيتوا ماقالي شئ سكوت ابويا يخلي تأنيب الضمير أقوى

وبس رجعنا البيت وانا خلااااص منتهية بطاريتي والنت لسا خربان واخويا واختي أشاكالهم تحكي قصص حزينة 😦 المهم صاروا احسن الحمدلله الله يسلمكم يارب الشر ما يجيكم ايوا ابشركم اخويا جالو نقل من الشرقية لجدة كنت بوريكم البطاقة بس اخاف من العين
الوالدين ورضاهم الوالدين ورضاهم الوالدين ورضاهم
رزقني الله وإياكم رضاهم ورضى رب السماء

Advertisements

8 تعليقات to “في الأحوال”

  1. ريــم Says:

    مبروووووك ع البطاقة يا ستّي و عؤبااالي

    كل ما أقول لهم بطلع بطاقة يقولون لي استني الاكتتابات تخلص ههههه

    تحياتي

  2. ناصر الحربـــــــي Says:

    أهنيكي على البطاقه بس لو أني أشوف مالها داعي ( ماراح تتحركوا إلاّ بإشاره مناّ يا معشر الرجال )

    تخيلي قبل شوي كنت في البنك شفت وحده واقفه شويه عن الصراف والشنبات مو منتظمين ومسوين زحمه بقوووووووووه

    وهي تقول : شويه ياجماعه أبسحب ( ياعيني على الحنيه )

    قلت في بالي هين والله ماتسحبين لين تطلع قرون في راسك

    انا قاعد أتفرج مخلص أموري ( واسطه لاعبه دورها )

    بصراحه حقت عليها مره مصختها حاطه ميك اب 2 كلم و لابسه عبايه مدري فستان لحد الآن ماني متأكد

    ………… ربي أرحمهما كما ربياني صغيرى …………

  3. ExGanza Says:

    هههههههههههههههههههههههههههه
    مبروك مبروك روز 😀
    خلاص صرتي سعوديه .. الله يعينك على تأنيب الضمير P :
    ومبروك نقل اخوووك

  4. الراقي Says:

    يلااااااااااا

    الف مبروك ..

    أنا أول مرره اهنئ عشان البطااقة …بس منجد فرحاان ليكِ

    عقبال البقية اللي مو قادرين يأخذو الجنسية ..اقصد البطاقة ..

  5. حلمي معي Says:

    مبرووووك على البطاقه
    وانا كمان رحت اطلع بطاقة الاحوال لحالي
    مع اخوي كمان

    بس كنت قدعه
    ولا نسيت الجوال
    وكلمت بابا وقلت بابا ايش اسوي p:

    بس صوورتي الحمدالله كاني طفله
    هههههههه
    والله جد شكلي صغيييييره
    مدري
    ممدري انا كبرت
    ما ادري ايش السالفه

    المهم
    مبروووك

  6. Expert Says:

    يوووه الوالده طلعتها من زمآآآن

    أثاريها متطوره أكثر من بنات هالجيل (؛

    على كلاً ألف مبروكـ ,جعلها تتكرر دوم بحياتكـ

  7. mbet0hm Says:

    لوووووووولييييييييييش مبرووووووووووووووووووووك

    يعطيك خيرها ويكفيك شرها 🙂 ،، اهم شئ الصورة طلعت مضبوطة

    تعرفين انا زوجة اخوي تشتغل هناك 🙂 يعني انواع الواسطات خخخخخخ
    دخلت باقل من دقايق وطلعت والبطاقة معاي ^__^

    كذا الواسطات ولا بلاااااااااااااااش

  8. Rose Says:

    اهلين ريمو
    الله يبارك فيكي يارب 🙂
    يلا إن شاء الله قريب تطلعيها 😛
    منورة 🙂

    ـــــــــــ

    ناصر
    نموذج الرجولة السعودية 😀
    محنا دمى في ايديكم يا معشر الرجال

    ــــــــــ

    ExGanza
    الله يبارك فيك خيو 😀
    ايوا صرت امرأة بهوية 😛
    الله يبارك فيييييك يارب 🙂
    منور

    ـــــــــــ

    اهلين الراقي
    الله يبارك فيك يارب
    دوم فرحان 🙂
    آميين 😀
    منور

    ــــــــــ

    حلمي معي
    اهلين ازيك
    الله يبارك فيكي
    يعني انا مو جدعة 😦 < تحطمت
    يختي مع التسطيل الواحد يكون مفوت 😛
    انا اشوف الناس لما تستلم البطاقة ضحك شلت هم يارب شكلي كيف يكون 😛
    الله يبارك فيكي اقين
    منوورة
    🙂

    ــــــــــ

    اهلين ابلة مضيعة
    الله يباااارك فيييييكي
    يعني بالواسطة ومشي كلو سريع مو زي انلطعت ساعة استنى 😛
    منورة
    🙂

التعليقات مغلقة.


%d مدونون معجبون بهذه: