أحبهم

البعض يستغرب لما أقول اشتقت لأخويا اللي يشتغل في الرياض أو اللي في الشمال أو بقية أخوتي يسألون مو أنتِ عندك أخ شقيق واحد أقول ايوا .. بس عندي أخون من أب وأخوات كلهم أكبر مني ، يسألوني عن علاقتي بهم كيف .. وهل بيننا مشاكل عشان هما من ابويا .. لا أبدا ما بيننا مشاكل بالعكس .. ما بيننا كلام أخوان من أب أو شئ من هذا القيبل ..

ليس شرط كل الأخوة من أب بينهم مشاكل .. الأمر يعود للتربية التي ينشئون عليها من قبل الأب لأن له التأثير الأكبر في هذه العلاقة .. أن يكون عادل في المعاملة بينهم أن يربيهم على أنه مالكم غير بعض في الأخير … أنه كلكم زي بعض مافي أحد أحسن من أحد .. ويعود أخواني على أنه أخواتكم مالهم غيركم ومالكم غيرهم …

دايما هما اللي يشاركوني كل مناسباتي .. يشاركوني التفكير في أمور كثيرة ما ألقاها في أي ناس … نشترك في أمور كثيرة عودنا عليها ابويا … كل شخص من العيلة له مجال مختلف تمام عن الثاني … ولكن نتفق أنه نفيد بعض .. نستشير بعض .. لأننا أخوان

لأننا نحمل اسم أغلى شخص على قلوبنا لازم عشانه نكون مميزين في كل شئ ، في تعاملنا ، في اللي نقدمه للمجتمع وكل شئ حلو نهديه لقلبه اللي ربانا على الخير والحب و الرحمة …. لما نقصر على بعض لما تمر فترة ما نشوف بعض دايم يسألنا ابويا وين الرحمة والمودة بينكم .. أختك مرضت وأخوكي سافر ورجع ولا شفتو بعض … صحيح مو ساكنين في بيت واحد لكن قلبونا على بعض .. وإذا ما حبيتهم أحب مين ؟؟؟!!!

واللي يعرفنا يلاحظ اختلاف في أمور كثيرة ولكن إختلافهم في أمور معنا مكمل لإختلافنا معهم .

تحية حب لهم ولكل قلب عرف معنى أن يكون أخت و أخ بكل ما تعنيه الكلمة